നിലവിലുള്ള അവസ്ഥയില്‍ തൃപ്തിവരാതെ എപ്പോഴും മെച്ചപ്പപ്പെട്ട ജീവിതാവസ്ഥ കൈവരിക്കാനുള്ള പ്രവണതയിലാണ് നാമുള്ളത്. പൂര്‍ണത അഥവാ പ്രശ്‌നങ്ങളില്‍നിന്നും പൂര്‍ണ വിമുക്തി അന്വേഷിക്കുന്ന പ്രകൃതി എന്നാണ് ജീവിത ശാസ്ത്രപരമായി അതിനെ വിശേഷിപ്പിക്കുന്നത്. അത്തരമൊരു പ്രകൃതി ഉള്ളതുകൊണ്ടുതന്നെ ചുറ്റുമുള്ള അവസ്ഥകളെയും ചലനങ്ങളെയും നിരീക്ഷിച്ചും പരീക്ഷിച്ചും പുതിയ പല ആശയങ്ങളും സിദ്ധാന്തങ്ങളും നെയ്ത്, അനേകം കണ്ടുപിടുത്തങ്ങളുണ്ടാക്കി ജീവിതം മുമ്പെത്തേക്കാള്‍ സൗകര്യപ്രദമാക്കാനുള്ള പ്രവര്‍ത്തനങ്ങളിലാണ് നാം എപ്പോഴും ഏര്‍പ്പെട്ടുകൊണ്ടിരിക്കുന്നത്. ഓരോ കണ്ടുപിടുത്തവും ഉണ്ടാകാനും അവ പ്രായോഗികവും ഫലപ്രദവുമാണെന്ന് പരിശോധിച്ച് ഉറപ്പാക്കാനും അതതിന് പറ്റിയ ലാബ് അഥവാ നിരീക്ഷണ പരീക്ഷണ സൗകര്യങ്ങള്‍ നമുക്ക് ആവശ്യമാണ്. അത് പ്രവര്‍ത്തിപ്പിക്കുന്ന ആളുകളും ഉണ്ടാകണം. അത്തരം അനേകതരം ലാബുകളെക്കുറിച്ച് ഇന്ന് നമുക്ക് അറിവുള്ളതാണല്ലോ. അതുപോലെ, നമ്മുടെ ജീവിതത്തെ പ്രശ്‌നങ്ങളില്‍നിന്നും മുക്തമാക്കി എപ്പോഴും സ്വസ്ഥതയോടെയും സമാധാനത്തോടെയും നിലകൊള്ളാനാവശ്യമായ അറിവുകള്‍ ശാസ്ത്രീയമാര്‍ഗേണ കണ്ടെത്താനും അവ പ്രായോഗികവും ഫലപ്രദവുമാണെന്ന് മറ്റുള്ളവരേയും അനുഭവതലത്തില്‍ ബോധ്യപ്പെടുത്താനും ഉള്ള പരീക്ഷണശാലയാണ് ലൈഫ് സയന്‍സ് ലാബ്.

നിലവിലുള്ള നേട്ടങ്ങളിലൊന്നും തൃപ്തിവരാതെ എപ്പോഴും പൂര്‍ണതാന്വേഷകരായി ജീവിക്കുന്നതിന്റെ ഫലമായി വിവിധതരം അഭിലാഷങ്ങളും ആശയങ്ങളും വിശ്വാസങ്ങളും (അവിശ്വാസങ്ങളും) മനുഷ്യരില്‍ ഉടലെടുക്കുന്നു. ഭിന്ന അഭിരുചികളോടെയാണെങ്കിലും ഓരോരുത്തരിലും ഉടലെടുക്കുന്ന ഇത്തരം ചിന്തകള്‍ അനുസരിച്ച് പ്രവര്‍ത്തിക്കുകയും അവയില്‍നിന്ന് നല്ല ഫലങ്ങള്‍ അനുഭവിക്കുകയും ചെയ്യുമ്പോഴാണ് അവരവരില്‍ സമാധാനവും സന്തോഷവും കുടികൊള്ളുക. പക്ഷേ, ഓരോരുത്തരും അവരുടെ ചിന്തകളും പ്രവര്‍ത്തനശൈലികളും സ്വീകരിച്ച് സ്വസ്ഥജീവിതം സാധ്യമാക്കാന്‍ ശ്രമിക്കുമ്പോള്‍തന്നെ നമ്മുടെയെല്ലാവരുടെയും പരാശ്രയപ്രകൃതി കാരണം മറ്റുള്ളവര്‍ക്ക് പ്രയാസങ്ങള്‍ ഉണ്ടാക്കാതെ നമ്മുടെ ചലനങ്ങളെ ക്രമപ്പെടുത്താനും നാം ഓരോരുത്തരും ബാധ്യസ്ഥരുമാണ്. എങ്കില്‍ മാത്രമേ സ്വസ്ഥവും സമാധാനപരവുമായ ജീവിതം എല്ലാവര്‍ക്കും ലഭിക്കുകയുള്ളൂ. ജീവതത്തെ ശാസ്ത്രീയമായി പഠിക്കുമ്പോള്‍ നമുക്ക് ബോധ്യമാകുന്ന കാര്യങ്ങളാണ് ഇവയെല്ലാം. ഇത്തരത്തില്‍ എല്ലാവര്‍ക്കും പരമാവധി സ്വസ്ഥവും സന്തോഷകരവുമായ ജീവിതം ഉറപ്പാക്കാനാവശ്യായ അനേകം ജീവിതശാസ്ത്ര തത്വങ്ങള്‍ മനസ്സിലാക്കാനും, അവ സംശയാലുക്കളെപോലും ബോധ്യപ്പെടുത്താനും, ബോധ്യപ്പെട്ടതനുസരിച്ച് ജീവിതം നയിക്കാനും, അപ്രകാരം ജീവിതം നയിക്കുമ്പോള്‍ ഉണ്ടായേക്കാവുന്ന പ്രശ്‌നങ്ങള്‍ കണ്ടെത്തി ആവശ്യമാണെന്ന് തോന്നുന്ന മാറ്റങ്ങള്‍വരുത്തി മെച്ചപ്പെട്ടരീതിയില്‍ പരിഷ്‌ക്കരിക്കാനും എങ്ങനെ എളുപ്പം കഴിയുമെന്ന അന്വേഷണത്തിന്റെ ഭാഗമായി ജീവിതശാസ്ത്രപരമായിതന്നെ രൂപപ്പെട്ടുവന്ന ആശയമാണ് ലൈഫ് സയന്‍സ് ലാബ്. ഇത്തരം കാര്യങ്ങള്‍ ഏറ്റവും നന്നായി നിര്‍വഹിക്കാനാകുമെന്നതാണ് ലൈഫ് സയന്‍സ് ലാബിന്റെ പ്രസക്തിയും പ്രയോജനങ്ങളും.